<<                          /\                              >>

Es gibt Leit, wenn die kumma zamm,
sogns anander wos sie fir Krankheitn ham.
An jedn tena sie erzähln,
wos ihna heit tut wieder fehln.

Mer konn es fast scho gor net sogn,
über wos die alles klogn.
Der Kopf, der Bauch, die Gall, die Niern,
all Tog tena sie wos anders gspürn.

Die ane über Kopfweh klegt,
die ander segt, sie schläft su schlecht,
die nächste tuts mit dem Kreislauf hobn
und wieder ane tut blos vo ihrn Stuhlgang sogn.

Dann sogns a, zu wos fir Dokter sie gehna,
wal die andern doch nix verstehna.
Mastns sen des do zwa oder drei
und a Heilpraktiker is a derbei.

Tut a neia Arznei in der Werbung kumma,
dann wird die a sufort eignumma.
Su redns daher so manche Stund,
wenn die net krank sen, sens net gsund.