<<                           /\                              >>

Um den Fremdnverkehr bo uns zu hebn
tuts etz an Kloster-, Kirchen- und Kartoffelradweg gebn,
denn nebn Kultur und Landschaft soll mer net vergessn,
ba uns in Frankn gibt es a wos Guts zum Essn.

Damit die Leit a die Heimat lerna kenna,
die Streckn durch die nähere Umgebung führn tena,
wenn mer do su fährt mit seim Rad,
mer an Eindruck vo der Landschaft hat.

Kartoffelradweg steht do zwor da,
ober fir die Frankn tut des der Äbirnweg sa,
a wenn nemmer suviel Äbirn wie friher werdn gessn,
die Frankn wern doch die Äbirn net vergessn.

In Frankn ghörn zum Brotn guda Äbirnkläß,
der Äbirnsalot ghört zu Schnitzl und Läberkäs,
as Äbirn sen a Pommfrit und die Krokettn,
de lässn si die Leit als Beilog scheckn.

Der Korl is zum Essn in an Wertshaus gwen,
do hats a Kartoffelpüree als Beilog gem
und do hat der Korl natürli sufort entdeckt,
dass des Püree genau wie a Äbirnstopfer schmeckt.