<<                          /\                              >>

Is sunst im Dorf mol aner gstorbn,
dann is des der Brauch su gwen,
dass ihn hobn die Nachbern zum Grob trogn,
do hats nix anders gebn.

Sterbt aner vo der Feierwehr,
dann is des heit nu so,
dass ihn die Kamerodn trogn,
tena den letzn Dienst ihn to.

A ich hob scho viel Leit naus trogn
ins Grob zur letztn Ruh,
sen alle gwesn vo Weiterndorf,
ich wor mit jedn a per Du.

Sechs Mann müssn mir do sa,
de wu den Sarg dann trogn
und wal der scho immer trogn worn is
drum nehma mir kann Wogn.

Bam Lied: Nun bringen wir den Leib zur Ruh,
do lassn mir den Sarg dann no,
a jeder is mit voll derbei,
wass wos er hat zum To.

Is der Sarg im Grob dann drunt,
dann denkst: Gott gib dir die ewige Ruh,
es messn alle amol sterbn,
es kummt a jeder dru.

Und geh ich vom Grob dann weg
und alles is vorbei
denkt ich unwillkürlich a nu dru:
Wer wird der Nächste sei?