<<                          /\                              >>

Sen im Herbst die Äpfl zeiti wordn,
die Ernt derham, die Äbirn grobn,
dann tut des Erntedankfest sa.
Des soll erinnern gross und kla,

man soll Gott dankn fir den Segn,
den wu uns Gott des Johr hat gebn,
denn des Johr des geht dem End etz zu
und die Natur hält Winterruh.

Doch denkt der Bauer bereits ans nei,
sät Kurn und Wintergerstn nei,
denn in der Bibl steht und des is gwiss,
dass all Johr Saat und Ernt a is.

Ober wie die Ernt ausfällt, des wass a jeder,
do kummt es ganz drauf u afs Wetter.
Is im Summer mol a Trucknheit,
dann jammern die Bauern fei scho gscheit.

Do hat dann friher, es hat sich su ghört,
in der Kärch der Pfarra bet
um Regn und um Gottes Gnad,
dass jeder wos zum Essn hat.

Doch soll er heit anu betn um an Regn
wu die Leit all Urlaub hem,
und in der Zeitung teners schreiben
die Bauern tena zuviel erzeign.

Gott macht mit dem Wetter wos er mog,
do hilft ka Schimpfn und ka Klog
und nehma muss mer su wies kummt,
a wenn mer manchmol aweng brummt.